اِبن العراق
لسان حال كل عراقي شريف.
أيادنية..
واطخلج راس..تخسين..!
أنه ربات المضايف..
والدواوين
أنه ابن الما تعذر ضيف..
فد يوم..
ولا سد بابه بوجوه المساكين
أنه ابن الحرة..
ومعزبة الخطار..
هله.. وبلسانهه تحيي المجبلين
آنه ابن العراق..
المابخل يوم..
على ناسه..
ونكر وگفة الطيبين
مشرعه بيوتنه..
للراح والجاي..
وعلى بيبانه..
نعلگ نياشين
من حلوگنه اليطلبنه ننطيه..
ولگمة زادنه..
نگسمهه نصين
يموت النخل وگفه..
ولا يطخ راس..
وانه مثله..
وأزود اعليه بقاطين
صحيح العيشة صعبة..
وجاسني الظيم..
وبعت بيتي..
وسكنت ابيت من طين
لكن ...ماشكيت الكان من كان..
ينشدوني..
وأگلهم ماشيه .. وزين
لو ألبس جرود..
وآكل تراب..
وأنام على الصخر..
واتحده السنين
ولا طخ راس ..
للمايسوه لو موت..
اباء ...وعزتي..
تساوي الملايين
ما أنذل.. ووطي الهام..
هيهات..
اليرضه الذلة..
مو من ربع الحسين
الى أن تنجلي..
والظلمة تنزاح..
ذاك الوكت عاد..
نسدد الدين
..........................
