صويحب مات ..
لا بيدر بـچـى بسـّكوت
ولا منجل ذكر چـفه
وأخذ ثاره
عجيبه ...
إشغير إطباعك
يهلمنجل
ظنيتك تداعي بدمه
من يموت
أثاري المات بيك المستحه
وما أظن بعد تخجل
حسافه الغيره ماتت
نامت بتابوت
ولبسنا أسود عليها
وأبد ما تعدل
ورد خايف علينا
من دفنها أخرس الزاتوت
بس يومي باديه
الحـچـي بحلگه إنشـّـل
المدن صارت بحر من ضيم
بيها الحوت ياكل حوت
والناس أعلى غفله
من أخذها العوز
نامت عالرصيف أيتام
من الجوع تتسوّل
تخلبص كل طبعنا
ما عرفناه اليّعت
وياهو المعتوت
زلمنا تيهت الدروب
تاهت بعد ما تندل
فدعه الضيم غطاها
تحشمهم تصيح بصوت
ولا واحد فزع
شعلان لو غضبان لو خزعل
العـگـل طاحت
سحـگـها العار
كلما عالطريق يفوت
ذليله زعلت اوي الروس
ألف حـگـّه
إذا العـگـال وي الراس
من يزعل
يهلمهيوب ....
أبختني أسولفلك
أريد أحـچـي حـچـي
المبخوت
لو شفت الحـچـي بيه ميل
يتعدّل
مضايفنا حزينه
ويبس بيها الزاد
إحجار أوگـف بالبلعوم
إشلون يفوت
يا بلعوم اليفوته
ويطعم الريج مر حنظل
طفى بيها الضوه
وطبها العمى البيوت
إتاني الشمس
بلكي تمر عليها
الشمس ما تقبل
إنـگـطع بينا النفس
نلهث لهث مشحوت
مكسورين
إنبوس إيد الخسيس
وبيه نتوسل
من قصيدتي مدن خرسّه _________
ليست هناك تعليقات:
إرسال تعليق